బాలీవుడ్ స్టార్స్ కోసం ‘సైరా’ స్పెషల్ షో

బాలీవుడ్ జనాలు కూడా తెలుగు సినిమా కోసం ఆతృతగా ఎదురు చూస్తున్నారు. ఈ క్రెడిట్ అంతా దర్శకధీరుడు రాజమౌళిదే. ‘బాహుబలి’తో తెలుగు సినిమా స్థాయిని పెంచారాయన. దేశం గర్వించదగ్గ సినిమాగా ‘బాహుబలి’ నిలిచింది. ఇక బాహుబలిని స్పూర్తిగా తీసుకొని టాలీవుడ్ నుంచి భారీ బడ్జెట్ సినిమాలొస్తున్నాయ్. బాలీవుడ్ లోనూ రిలీజ్ అవుతున్నాయి. ఇటీవలే సాహో గురించి బాలీవుడ్ జనాలు గొప్పగా మాట్లాడుకొన్నారు. మిక్సిడ్ టాక్ తెచ్చుకొన్న ‘సాహో’ కూడా బాలీవుడ్ లో రూ. 150కోట్లకి పైగా వసూళ్లు రాబట్టింది. ఇప్పుడు మరో తెలుగు సినిమా సైరా కోసం బాలీవుడ్ జనాలు ఆతృతగా ఎదురుచూస్తున్నారు.

సురేందర్ రెడ్డి దర్శకత్వంలో మెగాస్టార్ చిరంజీవి నటించిన చిత్రమిది. బాలీవుడ్ మెగాస్టార్ అమితాబ్ కీలక పాత్రలో నటించారు. అక్టోబర్ 2న సైరా ప్రేక్షకుల ముందుకు రానుంది. ఇటీవలే విడుదలైన సైరా ట్రైలర్ పై బాలీవుడ్ స్టార్స్ సల్మాన్ ఖాన్, అమీర్ ఖాన్ తదితరులు ప్రశంసలు కురిపించారు. ఇక బాలీవుడ్ స్టార్స్ కోసం త్వరలోనే ముంబైలో సైరా స్పెషల్ షో వేయనున్నారు. ఈ స్పెషల్ షోకి అమితాబ్ కుటుంబం, సల్మాన్ ఖాన్, అమీర్ ఖాన్, కరణ్ జోహార్, అలియా భట్, శ్రద్దా కపూర్ తదితరులు హాజరుకానున్నారు.