సైరా కోసం ఆ క్రికెటర్ వెయిటింగ్ !

దేశంలో సైరా మానియా మొదలైంది. టాలీవుడ్ మెగాస్టార్ చిరంజీవి తాజా చిత్రం ‘సైరా’. సురేంధర్ రెడ్డి దర్శకుడు. బాహుబలి, సాహో తర్వాత టాలీవుడ్ నుంచి వస్తున్న ప్యాన్ ఇండియా సినిమా ఇది. ప్రపంచవ్యాప్తంగా దాదాపు 4600 థియేటర్స్ లో సైరా రేపు (అక్టోబర్ 2) రిలీజ్ కానుంది. ఈ రాత్రికే ఓవర్సీస్ లో బెనిఫిట్ షోస్ పడిపోనున్నాయి.

ఇక మెగా అభిమానులు సాహో కోసం క్షణాలు లెక్కబెట్టుకొంటూ ఆతృతగా ఎదురు చూస్తున్నారు. క్రికెటర్ శ్రీశాంత్ కూడా ఈ వెయిటింగ్ లిస్టులో ఉన్నాడట. తాజాగా శ్రీశాంత్ సైరా సినిమాపై స్పందించారు. “సైరా టీజర్‌, ట్రైలర్స్ చూశాను. బాహుబలి కన్నా పెద్ద సినిమాగా అనిపిస్తుంది. రిలీజ్ రోజున కానీ, రిలీజ్ తర్వాత కానీ ఈ సినిమాను తప్పకుండా చూస్తాను. చిరంజీవి గారికి నేను పెద్ద అభిమానిని. హైదరాబాద్‌లో ఓ మ్యాచ్ ఆడుతున్న సందర్భంలో చిరంజీవి సార్‌ని కలుసుకున్నాను. క్రికెట్‌లో సచిన్ ఎలాగో.. సినిమాల్లో రజనీ సార్‌, చిరంజీవి సార్ లెజెండ్స్‌” అన్నారు శ్రీశాంత్.

ఇక అతి త్వరలో శ్రీశాంత్ పై ఉన్న ఐదేళ్ల నిషేధం పూర్తి కానుంది. దాంతో ఆయన మళ్లీ మైదానంలోకి అడుగుపెట్టనున్నారు. టీమిండియా జెర్సీ వేసుకొన్న అవకాశం రాకున్నా.. ఐపీఎల్ లో ఆడాలని శ్రీశాంత్ నిర్ణయించుకొన్నట్టు సమాచారమ్. ఇందుకోసం ఇప్పటి నుంచి ఫిట్నెస్ పై ఫోకస్ చేన్నాడు శ్రీ.