సీనియర్‌ జర్నలిస్ట్ రాఘవాచారి కన్నుమూత
సీనియర్‌ జర్నలిస్ట్, విశాలాంధ్ర మాజీ ఎడిటర్ చక్రవర్తుల రాఘవాచారి కన్నుమూశారు. గత కొన్నాళ్లుగా ఆయన తీవ్ర అనారోగ్యంతో బాధపడుతున్నారు. ఈ క్రమంలో హైదరాబాద్‌లోని ఓ ఆస్పత్రిలో చికిత్స పొందుతూ ఈ తెల్లవారుజామున రాఘవచారి తుది శ్వాస విడిచారు. రాఘవాచారి పార్థివ దేహాన్ని మఖ్దూమ్‌ భవన్‌కు తరలించారు.
రాఘవాచారి పార్థివదేహానికి సీపీఐ నేతలు నారాయణ, చాడ వెంకటరెడ్డి నివాళులర్పించారు. రాఘవాచారి మృతి పట్ల ఏపీ ముఖ్యమంత్రి జగన్‌ సంతాపం ప్రకటించారు. విలువలతో కూడిన జర్నలిజాన్ని ఆయన విశ్వసించారని పేర్కొన్నారు. యువ తరాలకు రాఘవాచారి ప్రేరణగా నిలిచారని కొనియాడారు. తెదేపా అధినేత చంద్రబాబు రాఘవాచారి మృతి పట్ల సంతాపం తెలిపారు.
