ఎవరికీ చెప్పొద్దు అనుకొన్నాం. కానీ.. !

టాలీవుడ్ సంచలనం విజయ్ దేవరకొండ ఎవరికీ చెప్పొద్దు అనుకొన్నాడు. కానీ తప్పలేదు. ఆయన నిర్మాతగా మారి చేస్తున్న చిత్రం ‘మీకు మాత్రమే చెప్తా’. షమ్మీర్‌ దర్శకుడు. వాణి భోజన్ హీరోయిన్. యాంకర్ అనసూయ కీలక పాత్రలో నటించారు. ఈ వారమే ప్రేక్షకుల ముందుకు రానుంది. ఈ నేపథ్యంలో ఈ సినిమాలో కీలక పాత్రలో నటించిన అభినవ్‌ గౌతమ్‌ పలు ఆసక్తికర విషయాలు పంచుకొన్నాడు. ‘అర్జున్‌ రెడ్డి’ సినిమా విడుదలవ్వక ముందు ఈ కథని విజయ్ దేవరకొండకి చెప్పారట.

ఆయన కథ బాగా నచ్చింది. ఒకవేళ ‘అర్జున్‌రెడ్డి’ సినిమా హిట్‌ అయితే ఈ సినిమాలో నేను నటించలేకపోవచ్చు. కానీ ఈ సినిమాకు మాత్రం నిర్మాతగా వ్యవహరిస్తానని చెప్పారట. అర్జున్ రెడ్డి బ్లాక్ బస్టర్ హిట్ కావడంతో విజయ్ ఈ సినిమాలో నటించలేకపోయారు. కానీ, ఇచ్చిన మాట ప్రకారం సినిమాకి నిర్మాతగా మారాడు. అది కూడా పెళ్లిచూపులు సినిమాతో హీరోగా తనకి హిట్ ఇచ్చిన దర్శకుడు తరుణ్ భాస్కర్ ని హీరోని చేసి.. ఈ సినిమాని నిర్మించడం విశేషం. 

ఇక ఈ సినిమా కోసం ముందుగా ‘ఎవరికీ చెప్పొద్దు’ టైటిల్‌ అనుకున్నారట. కాకపోతే అదే టైటిల్‌తో ఇటీవల ఓ సినిమా కూడా విడుదలయ్యింది. దీంతో డైరెక్టర్‌ షమ్మీర్‌ ‘మీకు మాత్రమే చెప్తా’ టైటిల్‌ను ఫిక్స్‌ చేశారని అభినవ్‌ గౌతమ్‌ తెలిపారు.