అమ్మ లుక్’లో కంగనాని చూశారా ?
దివంగత తమిళనాడు ముఖ్యమంత్రి జయలలిత బయోపిక్ లు క్యూ కట్టబోతున్న సంగతి తెలిసిందే. ఇందులో దర్శకుడు ఏ ఎల్ విజయ్ తీసుకొస్తున్న ‘తలైవి’ ఒకటి. జయలలితగా కంగన నటిస్తుండగా.. ఎంజీఆర్‌గా అరవింద్‌ స్వామి కనిపించనున్నారు. జీవీ ప్రకాశ్‌ కుమార్‌ ఈ సినిమాకు సంగీతం అందిస్తున్నారు. విష్ణు ఇందూరి, శైలేష్‌ ఆర్‌ సింగ్‌ సినిమాను నిర్మిస్తున్నారు. తాజాగా తలైవి ఫస్ట్ లుక్ ని విడుదల చేశారు.
అమ్మ లుక్‌లో కంగనా రనౌత్‌ ఒదిగిపోయింది. పచ్చచీరలో అభివాదం చేస్తున్న బ్యానర్‌ను ఈ తొలి ప్రచార చిత్రంలో చూపించారు. అయితే పోస్టర్‌లో ఉన్నది కంగన అని గుర్తు పట్టడానికి చాలా సమయం పట్టడంతో నెటిజన్లు ఆశ్చర్యపోతున్నారు. వచ్చే ఏడాది జూన్ 26న ఈ చిత్రాన్ని విడుదల చేయబోతున్నట్లు యూనిట్‌ ఈ సందర్భంగా ప్రకటించింది. ‘ఈ లెజెండ్‌ మనందరికీ తెలుసు. కానీ ఆమె కథ అందరికీ ఇంకా చెప్పాల్సి ఉంది’ అని టీం పేర్కొంది.
