తెలుగు ‘పింక్’.. పవన్ ఫస్ట్ లుక్ !
పవర్ స్టార్ పవన్ కల్యాణ్ అభిమానులకి గుడ్ న్యూస్. పవన్ మళ్లీ సినిమాల్లోకి వచ్చేశారు. మొహానికి రంగేసుకున్నారు. పింక్ రిమేక్ తో పవన్ రీ ఎంట్రీ ఇస్తున్న సంగతి తెలిసిందే. యువ దర్శకుడు వేణు శ్రీరామ్ దర్శకత్వంలో తెలుగు పింక్ తెరకెక్కుతోంది. బోనీ కపూర్ తో కలిసి దిల్ రాజు నిర్మిస్తున్నారు. ఈ చిత్రానికి థమన్ సంగీతం అందిస్తున్నారు.
సోమవారం ఈ సినిమా రెగ్యూలర్ షూటింగ్ మొదలైంది. తొలిరోజు సెట్స్ నుంచి పవన్ ఫోటో ఒకటి బయటికొచ్చింది. సోషల్ మీడియాలో వైరల్ అయింది. ఇందులో పవన్ గెడ్డెం లుక్ లో కనిపిస్తున్నారు. తెల్లవారుజామునే బస్తీలో వాకింగ్ చేస్తున్న స్టిల్ లా ఉంది. ఇదే పింక్ నుంచి ఫస్ట్ లుక్.. పవన్ ఫస్ట్ లుక్ గా మెగా అభిమానులు భావిస్తోంది.
ఇక పవన్ సినిమా ప్రారంభమైన తొలిరోజే ఏపీ రాజకీయాలు మరింత హీటెక్కాయి. మూడు రాజధానుల బిల్లుకి సోమవారం ఏపీ అసెంబ్లీ ఆమోదం తెలిపింది. ఈ నేపథ్యంలో ఈ బిల్లుని వ్యతిరేకిస్తూ సోమవారం రాత్రి అమరావతి గ్రామాల్లో పాదయాత్ర చేసేందుకు పవన్ ప్రయత్నించారు. ఆయన్ని పోలీసులు అడ్డుకున్నారు. దీనిపై పవన్ తీవ్ర ఆగ్రహం వ్యక్తం చేశారు. మూడు రాజధానుల ఏర్పాటునే వైసీపీ వినాశనానికి నాంది అని పవన్ విమర్శించారు.
