కాలువలోకి దూసుకెళ్లిన కారు.. ఇద్దరు మృతి !

శ్రీకాకుళం జిల్లాలో విషాదం చోటు చేసుకుంది. శ్రీకాకుళం జిల్లా హిరమండలం రిజర్వాయర్ ను ఆనుకుని ప్రవహిస్తున్న కాలువలోకి కారు దూసుకెళ్లింది. ఈ ప్రమాదంలో ఇద్దరు చనిపోగా, మరో ముగ్గురు తీవ్ర గాయాలతో బయటపడ్డారు. విశాఖలోని కోరమాండల్ ఫెర్టిలైజర్స్ లో ఏరియా మేనేజర్లుగా పనిచేస్తున్న రాజమండ్రివాసి పవన్ (32), ఖమ్మంవాసి బిందేటి చంద్రమోహన్ (45)తోపాటు మరో ముగ్గురు ఉద్యోగులు వెంకటగిరి ప్రసాద్, ఎం.మహేశ్వరరావు, ఎస్.దుర్గా నాగప్రవీణలు ఒడిశా రాష్ట్రం పర్లాఖిమిడిలోని సెంచూరియన్ యూనివర్సిటీలో జరిగే సమావేశానికి హాజరయ్యారు. గురువారం అర్ధరాత్రి తర్వాత తిరిగి విశాఖ ప్రయాణమయ్యారు.

కారు అర్ధరాత్రి దాటాక హిరమండలం వద్దకు వచ్చేసరికి అదుపుతప్పి రోడ్డు పక్కనే ఉన్న కాలువలోకి దూసుకుపోయింది. ఈ ఘటనలో పవన్, చంద్రమోహన్ లు కారులోనే చనిపోయారు. అతివేగమే ఈ ప్రమాదానికి కారణని అంచనా వేస్తున్నారు. ప్రమాద సమయానికి కాలువలో తొమ్మిది అడుగుల ఎత్తున నీరుంది. దీంతో పైనుంచి నీటిని నిలుపుచేసి కారును బయటకు తీశారు. ఈ ప్రమాదంపై కేసు నమోదు చేసిన పోలీసులు దర్యాప్తు మొదలెట్టారు.