టాలీవుడ్ స్టార్స్.. పాన్ ఇండియా మోజు ఎందరికీ ?

టాలీవుడ్ స్టార్ హీరోలు పాన్ ఇండియా సినిమాపై మోజు పడినట్టు ప్రచారం జరుగుతోంది. కానీ, అందులో నిజం లేదని తెలుస్తోంది. యంగ్ రెబల్ స్టార్ ప్రభాస్ కి మాత్రమే పాన్ ఇండియా సినిమాపై మోజు కనబడుతోంది. బాహుబలి తర్వాత ఆయన సాహో సినిమా చేశాడు. మిక్సిడ్ టాక్ తెచ్చుకున్న సాహో భారీ వసూళ్లని రాబట్టింది. ప్రభాస్ చేస్తున్న సినిమాలన్నీ పాన్ ఇండియా సినిమాలుగానే రాబోతున్నాయి. 

ఆర్ఆర్ఆర్ కథానాయకులు ఎన్టీఆర్. రామ్ చరణ్ లు మాత్రం పాన్ ఇండియా సినిమాపై పెద్దగా ఆసక్తిగా లేరు. తారక్ తదుపరి సినిమా త్రివిక్రమ్ దర్శకత్వంలో ఉండనుంది. ఇక రామ్ చరణ్ తదుపరి సినిమా కొరటాల శివ దర్శకత్వంలో తెరకెక్కనుంది. మహేష్ గురించి ప్రత్యేకంగా చెప్పనక్కర్లేదు. ఆయన టాలీవుడ్ సినిమాలు మాత్రమే చేస్తానని తేల్చేశాడు.

పవన్‌కళ్యాణ్‌తో క్రిష్ తీస్తోన్న చిత్రం పాన్ ఇండియా మార్కెట్‌ని టార్గెట్ చేయవచ్చు. సైరా అనుభవంతో ఇక చిరంజీవి అటు వెళ్లకపోవచ్చు. యువ హీరోల్లో విజయ్ దేవరకొండ మొదటి ప్రయత్నాన్ని పూరి సినిమాతో చేస్తున్నాడు. అల్లు అర్జున్ మాత్రం పాన్ ఇండియా సబ్జెక్ట్ తీసుకురమ్మని తెలిసిన దర్శకులకి చెబుతున్నాడు. మొత్తంగా.. టాలీవుడ్ స్టార్స్ లలో పాన్ ఇండియా మోజు తక్కువనే చెప్పవచ్చు.