రాజమౌళి లక్ష్యం అదే

అభిమానులు మెచ్చేలా సినిమా తీస్తే సరిపోతుందని దర్శకులు చెబుతుంటారు. కానీ, అభిమానులతో పాటు ప్రేక్షకులు సినిమాని ఎంజాయ్ చేయాలి. అదే నా లక్ష్యం అన్నారు దర్శక ధీరుడు రాజమౌళి. తాజాగా ఓ బాలీవుడ్‌ మీడియాకు ఇంటర్వ్యూ ఇచ్చారు. ఇటీవల విడుదల చేసిన ‘ఆర్‌.ఆర్‌.ఆర్‌’ మోషన్‌ పోస్టర్‌ గురించి ముచ్చటించారు.

ఆర్ ఆర్ ఆర్ లో తారక్‌, చరణ్‌లాంటి ఇద్దరు స్టార్స్‌ ఉన్నారు. అయితే థియేటర్‌కు వెళితే ఫ్యాన్స్‌ తక్కువగా ఉంటారు.. ప్రేక్షకులు ఎక్కువగా ఉంటారు. అభిమానులు కేకలు వేస్తూ సినిమాను ఎంజాయ్‌ చేస్తారు. కానీ, ప్రేక్షకులు ఎలా ఎంజాయ్‌ చేస్తున్నారు, వారి అభిప్రాయాలు ఏంటని గమనించాలి. ఇప్పుడు సాధారణ ప్రజలు సైతం మా మోషన్‌ పోస్టర్‌ను ఇష్టపడ్డారు. అందుకు హ్యాపీగా ఉందన్నారు జక్కన్న.

‘ఆర్‌.ఆర్‌.ఆర్’లో అల్లూరి సీతారామరాజుగా చెర్రీ, కొమరం భీమ్‌గా తారక్‌ నటిస్తున్నారు. అలియా భట్‌, ఒలివియా మోరిస్‌ కథానాయికలు. 2021 జనవరి 8న చిత్రాన్ని ప్రేక్షకుల ముందుకు తీసుకురావడానికి సన్నాహాలు చేస్తున్నారు.