ఒక్కరోజులోనే 11,502 కేసులు, 325 మరణాలు

దేశంలో కరోనా విజృంభణ కొనసాగుతోంది. ప్రతిరోజూ 10వేలకి పైగా నమోదవుతున్న కరోనా కొత్త కేసుల సంఖ్య.. సోమవారం 11వేలు దాటింది. గడచిన 24గంటల్లో దేశవ్యాప్తంగా 11,502 పాజిటివ్‌ కేసులు నమోదయ్యాయి. దీంతో దేశంలో మొత్తం కరోనా‌ కేసుల సంఖ్య 3,32,424కి చేరినట్లు కేంద్ర ఆరోగ్య, కుటుంబ సంక్షేమశాఖ వెల్లడించింది.

సోమవారం ఒక్కరోజే కరోనాతో 325మంది ప్రాణాలు కోల్పోయారు. దీంతో దేశంలో కరోనా వైరస్‌ సోకి మరణించిన వారిసంఖ్య 9520కి చేరింది. దేశంలో కరోనావైరస్‌ సోకిన మొత్తం బాధితుల్లో ఇప్పటివరకు 1,69,798 మంది కోలుకోగా మరో 1,53,106 మంది చికిత్స పొందుతున్నట్లు కేంద్ర ప్రభుత్వం ప్రకటించింది. అయితే, ప్రస్తుతం దేశంలో క్రియాశీలంగా ఉన్న బాధితుల సంఖ్య కంటే కోలుకున్న వారి సంఖ్య ఎక్కువగా ఉండటం కాస్తం ఊరటనిస్తోంది.