పెట్రోల్ ధరను దాటేసిన డీజిల్
దేశంలో పెట్రో ధరల పెంపు కొనసాగుతోంది. వరుసగా 18వ రోజు డీజిల్ ధరలను పెంచుతూ చమురు సంస్థలు నిర్ణయం తీసుకున్నాయి. అయితే, ఈ రోజు లీటర్‌ డీజిల్‌పై 48పైసలు చొప్పున పెంచిన సంస్థలు.. పెట్రోల్ ధరలను యథాతథంగానే కొనసాగించడం గమనార్హం. దీంతో పెట్రోల్ ధరను డీజిల్ దాటేసింది.
తాజా పెంపుతో రూ.79.40గా ఉన్న లీటర్‌ డీజిల్ ధర దిల్లీలో రూ.79.88కి పెరగ్గా.. పెట్రోల్ ధర మాత్రం యథాతథంగా 79.76వద్ద ఉంది. పెట్రోల్ ధర కంటే డీజిల్ ధర ఎక్కువగా ఉండటం ఇదే తొలిసారి. ఈ 18 రోజుల కాలంలో లీటర్‌ పెట్రోల్ ధర రూ.9.41.. డీజిల్ ధర 9.58 చొప్పున పెరిగాయి. ఇన్నాళ్లు పెట్రో, డీజీల్ ధరలకి రూ. 10 నుంచి రూ. 20 వ్యత్యాసం ఉండేది. ఇప్పుడు డీజిల్ ధరలు పెట్రోల్ ధరలని మించిపోవడం వాహనధారులని షాక్ కి గురిచేస్తున్నాయి. పెట్రో రేట్స్ పెరుగుదలతో.. నిత్యవసర వస్తువుల ధరలు పెరగనున్నాయని విశ్లేషకులు చెబుతున్నారు.
