24 గంటల్లో 64వేల కరోనా కేసులు.. 60వేల మంది రికవరీ !

దేశంలో కరోనా విజృంభణ కొనసాగుతోంది. ప్రతిరోజూ 60వేలకు పైగా కొత్త కేసులు నమోదవుతున్నాయి. అదే సమయంలో కరోనా నుంచి కోలుకున్న వారి సంఖ్య కూడా పెరుగుతుండటం ఊరటనిస్తోంది. దేశంలో గడిచిన 24గంటల్లో కొత్తగా 64,531 పాజిటివ్‌ కేసులు నమోదయ్యాయి. దీంతో దేశంలో మొత్తం కరోనా కేసులసంఖ్య 27,67,273కు చేరింది. వీరిలో ఇప్పటివరకు 20లక్షల 37వేల మంది కోలుకోగా మరో 6లక్షల 76వేల క్రియాశీల కేసులు ఉన్నాయి.

నిన్న ఒక్కరోజే అత్యధికంగా 1092మంది కరోనా రోగులు మృత్యువాతపడ్డారు. ఒకేరోజు దాదాపు 1100మంది చనిపోవడం ఆందోళన కలిగిస్తోంది. రోజువారీ కొవిడ్‌ మరణాలు వెయ్యి దాటడం ఇది మూడోసారి. దీంతో బుధవారం నాటికి దేశంలో కరోనా మరణాల సంఖ్య 52,889కు చేరినట్లు కేంద్ర ఆరోగ్య, కుటుంబ సంక్షేమశాఖ వెల్లడించింది. ప్రస్తుతం దేశంలో కొవిడ్‌ బాధితుల మరణాల రేటు 1.9శాతంగా ఉంది.