షర్మిల పార్టీలో.. సినీ గ్లామర్ !

వైఎస్ షర్మిల తెలంగాణలో కొత్త పార్టీ పెట్టబోతున్నట్టు ప్రకటించిన సంగతి తెలిసిందే. పార్టీ ప్రకటనకి ముందు ఆమె జిల్లాల నేతలు, వైఎస్ అభిమానులతో సమావేశాలు నిర్వహిస్తున్నారు. అయితే షర్మిల పార్టీ జెండా-అజెండా ప్రకటించక ముందే.. ఆమె పార్టీలోకి వలసలు పెరుగుతున్నాయి. సినీ, రాజకీయనేతలు షర్మిల పార్టీలో చేరేందుకు ఆసక్తిని చూపిస్తున్నారు. ఈ జాబితాలో సినీ ప్రముఖులు ఉండటం విశేషం.

ఇప్పటికే ప్రముఖ యాంకర్ శ్యామలా రెడ్డి షర్మిలకు మద్దతు తెలిపారు. తాజాగా నటి ప్రియ సయితం షర్మిలతో కలిసి నడుస్తామని ప్రకటించారు.
తాను చిన్నప్పటి నుంచి రాజశేఖర్ రెడ్డికి పెద్ద అభిమానిని. వైఎస్‌ను ఎప్పుడైనా కలవాలని ఉండేదని.. కానీ కలవలేకపోయా. ఇప్పుడు షర్మిల పార్టీ పెడుతున్నట్లు ప్రకటన చేయడం చాలా సంతోషంగా ఉందన్నారు. షర్మిలతో కలిసి తాను కూడా ప్రజలకు సేవ చేయాలని అనుకున్నానని తెలిపారు.

మరోవైపు కాంగ్రెస్ నుంచి షర్మిల పార్టీలోకి వలసలు కొనసాగుతున్నాయి. వైఎస్ హయాంలో కాంగ్రెస్ పార్టీలో పని చేసిన కల్పనా రెడ్డి షర్మిల పెట్టబోయే పార్టీకి మద్దతు తెలిపారు. సోమవారం లోటస్ పాండ్‌లో మహిళా దినోత్సవ వేడుకలను ఘనంగా నిర్వహించడానికి ఆమె ఏర్పాట్లు చేస్తున్నారు. ఈ సందర్భంగా కల్పనారెడ్డితో పాటు పలువురు మహిళలు షర్మిలని కలిసే అవకాశాలు కనిపిస్తున్నాయి