పొలిటికల్ ఎంట్రీపై ఎన్టీఆర్ లెటెస్ట్ కామెంట్స్
యంగ్ టైగర్ ఎన్టీఆర్ కు రాజకీయాలు కొత్తేమీ కాదు. గతంలోనే ఆయన తెదేపా తరుపున ప్రచారం చేశారు. పార్టీ గెలుపు కోసం ప్రయత్నించారు. తన మాటలతో ప్రజలని ఆకట్టుకున్నారు. తారక్ మాటల దాడి గురించి తెలుసు కాబట్టే.. తెదేపాకు పూర్వ వైభవం రావాలంటే తారక్ రాజకీయాల్లోకి రావాస్లిందేనని తెదేపా కార్యకర్తలు, అభిమానులు కోరుకుంటున్నారు. అయితే తారక్ మాత్రం ఇవేవీ పట్టనట్టు సినిమాలతో బిజీగా గడుపుతున్నారు.
తాజాగా రాజకీయాల్లో ఎప్పుడొస్తారని తారక్ ని ఓ అభిమాని అడిగేశారు. తారక్ హోస్ట్ గా జెమినీ టీవీలో ప్రసారం కానున్న ‘ఎవరు మీలో కోటీశ్వరులు’ షో ప్రెస్ మీట్ లో పాల్గొన్న తారక్ కి ఈ ప్రశ్న ఎదురైంది. దీనికి తారక్ సమయస్పూర్తితో సమాధానం ఇచ్చారు. ఈ ప్రశ్నకు సమాధానం మీరే చెప్పాలంటూ సదరు అభిమానిని ప్రశ్నించారు. ఇది సమయం కాదు. సందర్భం కాదు. దీని గురించి తర్వాత మాట్లాడుకుందామని దాటవేశారు. కానీ రాజకీయాల్లోకి రావట్లేదని మాత్రం అనలేదు. దీంతో.. తారక్ ఇప్పుడు కాకపోయినా.. భవిష్యత్ లో రాజకీయాల్లోకి రావడం గ్యారెంటీ అని అభిమానులు ఫిక్సయిపోతున్నారు.
