వారం రోజుల పాటు చంద్రబాబుకు సీఎం బాధ్యతలు

కరోనా విజృంభిస్తున్న కఠిన సమయంలో ఏపీ ముఖ్యమంత్రిగా చంద్రబాబు ఉంటే.. బాగా చేసేవాడని. ముందు జాగ్రత్తలు తీసుకుంటూ.. ప్రజల కష్టాలని తగ్గించేవారనే కామెంట్స్, కొన్ని వీడియోలు సోషల్ మీడియాలో వైరల్ అవుతున్న సంగతి తెలిసిందే. అవి చంద్రబాబు వీరాభిమానులు చేస్తున్నవి అని ప్రత్యేకంగా చెప్పనక్కర్లేదు. అయితే నిజంగానే చంద్రబాబుకు ఓ వారం రోజుల పాటు సీఎం బాధ్యతలు ఇచ్చి చూడుర్రి. కరోనా నుంచి రాష్ట్రాన్ని ఎలా గట్టెక్కించాలో చేసి చూపిస్తారని తెదేపా నేత పట్టాభి ప్రభుత్వానికి సవాల్‌ విసిరారు. చంద్రబాబు అధికారంలో ఉంటే పరిస్థితులు మరింత దిగజారేవంటూ ప్రభుత్వ సలహాదారు సజ్జల రామకృష్ణారెడ్డి చేసిన విమర్శలపై ఆయన ఈ విధంగా స్పందించారు.

గతంలో ఒకరోజు సీఎం కాన్సెప్ట్ తో దర్శకుడు శంకర్ ‘ఒకే ఒక్కడు’ సినిమా తీశాడు. బ్లాక్ బస్టర్ హిట్ అయింది. ఆ కథని తనని ఆదర్శంగా తీసుకొనే శంకర్ రాసుకొన్నారని చంద్రబాబు పలు మార్లు చెప్పిన సంగతి తెలిసిందే. బహుశా.. ఇప్పుడు.. ఇదే కాన్సెప్ట్ ని ఫాలో అయి.. ఓ వారం రోజుల పాటు చంద్రబాబుని సీఎం చేయాలని.. తెదేపా నేతలు కోరుతున్నట్టున్నారు. అయితే గత దఫా ఐదేళ్లు సీఎం చేసిన చంద్రబాబుని ఏపీ ప్రజలు భరించలేకే.. ఘోరంగా ఓడగొట్టిన సంగతి తెలిసిందే. అలాంటిది.. ఇప్పుడు ఓ వారం రోజుల పాటు చంద్రబాబు సీఎం అంటే.. సీఎం జగన్ ఒప్పుకున్నా.. ఏపీ ప్రజలు అస్సలు ఒప్పుకోరేమో.. !