కరోనాకు మరో జర్నలిస్ట్ బలి.. టీఎన్నార్ కన్నుమూత !
ప్రముఖ జర్నలిస్ట్, నటుడు టీఎన్నార్ కరోనాతో పోరాటంలో ఓడిపోయారు. కొద్దిసేపటి క్రితమే ఆయన తుదిశ్వాస విడిచారు. కొద్ది రోజుల క్రితం.. ఆయ‌న‌కు క‌రోనా సోకింది. ఇంట్లోనే ఉంటూ, చికిత్స తీసుకున్నారు. అయితే పరిస్థితి విష‌మించ‌డంతో ఆయ‌న్ని హైద‌రాబాద్ లోని ఓ ప్రైవేటు ఆసుప‌త్రిలో చేర్చారు. చికిత్స అందించారు. ఐతే కోలుకున్నట్టే కనిపించిన టీఎన్నార్ ఆరోగ్య పరిస్థితి ఒక్కసారిగా సీరియస్ అయింది. ఆదివారం ఆయన పరిస్థితి అత్యంత విషమంగా ఉన్నట్టు వార్తలు వచ్చాయి. కోమాలోకి వెళ్లారని తెలిపారు. ఈ క్రమంలో చికిత్స పొందుతూ ఈ ఉదయం టీఎన్నార్ కన్నుమూశారు.
టీఎన్నార్ టాక్ షో పేరుతో.. ఆయన సినీ ప్ర‌ముఖుల‌తో నిర్వ‌హించిన ఇంట‌ర్వ్యూలు బాగా పాపుల‌ర్ అయ్యాయి. అవే.. ఆయ‌న‌కు మంచి గుర్తింపు తీసుకొచ్చాయి. ఆ త‌ర‌వాత కొన్ని సినిమాల్లోనూ న‌టించారు. ఇటీవల నటుడిగా బిజీగా అయ్యారు. బహుశా.. ఆయన బిజీ నటుడిగా అవ్వడం విధికి ఇష్టం లేనట్టుంది. కరోనాతో ఆయన పరలోకానికి తీసుకెళ్లింది. టీఎన్నార్ మృతితో టాలీవుడ్ లో విషాద ఛాయలు నెలకొన్నాయి. పలువురు సినీ ప్రముఖులు సోషల్ మీడియా వేదికగా టీఎన్నార్ కు సంతాపం తెలియజేస్తున్నారు.
