నానికేమైంది ?

డబుల్ హ్యాట్రిక్ హిట్స్ కొట్టిన ఏకైక టాలీవుడ్ హీరో నేచురల్ స్టార్ నాని. యేడాదికో మూడ్నాలుగు సినిమాలు.. చేసినవన్నీ సూపర్ హిట్. ఇలా మూడు పువ్వులు, ఆరు కాయలుగా సాగే నాని కేరీర్ ఒక్కసారిగా.. గాడి తప్పింది. వరుస హిట్స్ స్థానంలో వరుస ప్లాపులు పలకరిస్తున్నాయి.

ఈమ‌ధ్య‌కాలంలో నానికి వ‌రుస‌గా 5 ఫ్లాపులొచ్చాయి. శ్రీ‌కృష్ణార్జున యుద్ధం, దేవ‌దాస్‌, గ్యాంగ్ లీడ‌ర్‌, వి… ఇప్పుడు ట‌క్ జ‌గ‌దీష్‌… ఇవ‌న్నీ ఫ్లాపులే. ఓర‌కంగా నాని త‌న కెరీర్‌లోనే అత్యంత క్లిష్ట‌మైన ప‌రిస్థితిని ఎదుర్కొంటున్న సీజ‌న్ ఇదే కావొచ్చు. ఈ 5 సినిమాల్లో క‌థ‌ల విష‌యంలో నాని జ‌డ్జిమెంట్ ఘోరంగా ఫెయిల్ అయ్యింద‌నే చెప్పాలి. వి, ట‌క్ జ‌గ‌దీష్ సినిమాలు ఓటీటీకి వెళ్లి బతికిపోయాయ్. లేదంటే భారీ డిజాస్టర్స్ అయ్యేవి. ఓటీటీ రిలీజ్ తో నిర్మాతలు, డిస్ట్రిబ్యూటర్స్ బతికిపోయారు.

నాని టేస్ట్ తెలిసిన కథానాయకుడు. క‌థ‌ల ఎంపిక విష‌యంలో పక్కాగా ఉంటాడు. అయితే ఇప్పుడు నాని ఒక్క‌సారి పున‌రాలోచించుకోవాలి. నాని బ‌లం.. వినోదం. ప్రేమ‌క‌థ‌లు త‌న‌కి బాగా న‌ప్పుతాయి. అందులో ఎమోష‌న్ ఉండేలా చూసుకుంటే.. నానికి తిరుగుండ‌దు. పైగా అత్యంత స‌హ‌జ‌మైన త‌న న‌ట‌న‌ని ప్ర‌ద‌ర్శించే వీలు ద‌క్కుతుంది. అది కాద‌ని, త‌న‌కు న‌ప్ప‌ని జోన‌ర్లు ఎంచుకుంటే ఇలాంటి ఫ‌లితాలే చూడాల్సివ‌స్తుంది.