ఎన్టీఆర్ బయోపిక్ : బాలయ్య, క్రిష్’లకు నోటీసులు
మహానటుడు ఎన్టీఆర్ బయోపిక్’ని ఆయన తనయుడు, హీరో బాలకృష్ణ తీసుకొస్తున్న సంగతి తెలిసిందే. క్రిష్ దర్శకత్వంలో ‘ఎన్టీఆర్’ జీవితగాధ తెరకెక్కనుంది. ఇప్పటికే స్క్రిప్టు పనులు పూర్తయ్యాయి. నటీనటుల ఎంపిక కూడా దాదాపు పూర్తయ్యింది. ఎన్టీఆర్ భార్య బసవతారకం పాత్రలో బాలీవుడ్ నటి విద్యాబాలన్, ఆనాటి ముఖ్యమంత్రి నాదెండ్ల భాస్కర్ రావు పాత్ర కోసం బాలీవుడ్ నటుడు సచిన్ కేడ్కర్ ని తీసుకొన్నారు. ఇప్పుడీ చిత్రం పట్ల నాదెండ్ల కుటుంబం అభ్యంతరం వ్యక్తం చేసింది. నాదెండ్ల భాస్కర్ రావు పెద్ద కుమారుడు దర్శకుడు క్రిష్, నటుడు బాలకృష్ణకు నోటీసులు పంపారు. సినిమాలో తమ తండ్రి గురించి ఎటువంటి అనుమతి తీసుకోలేదు. భాస్కర్ రావును నెగిటివ్‌ గా చూపించే ప్రయత్నం చేస్తున్నట్లు ఆరోపించారు.
ఇక, ఈ బయోపిక్ లో చంద్రబాబు నాయుడు పాత్రలో రానా దగ్గుపాటి, ఏఎన్నార్ పాత్రలో నాగచైతన్య, సూపర్ స్టార్ కృష్ణ పాత్ర కోసం మహేష్ బాబుని తీసుకొన్నట్టు తెలిసింది. జులై 5 నుంచి సినిమాని సెట్స్ మీదకు తీసుకురానున్నారు. వచ్చే యేడాది సంక్రాంతి కానుకగా ప్రేక్షకుల ముందుకు తీసుకురానున్నారు. ఎన్ టీఆర్ బయోపిక్ ని రెండు భాగాలుగా చూపించేందుకు దర్శకుడు క్రిష్ ఆసక్తి చూపుతున్నట్టు తెలుస్తోంది. దీనిపై ఇంకా తుది నిర్ణయం తీసుకోలేదు. అన్న ఎన్టీఆర్ జీవితాన్ని తెరపై చూడ్డానికి తెలుగు ప్రజలు ఆసక్తిగా ఎదురు చూస్తున్నారు. ఐతే, ఈ సినిమా టీడీపీకి ఎన్నికల అస్త్రంగా కూడా ప్రచారం జరుగుతోంది.
