రాధేశ్యామ్.. @1 మిలియన్

మన రాత మన చేతుల్లో లేదు, చేతల్లో ఉంటుందనే విషయాన్ని ఓ ప్రేమకథతో ముడిపెట్టి చెప్పే ప్రయత్నం చేశాడు దర్శకుడు కెకె. రాధాకృష్ణ. ఆయన దర్శకత్వంలో ప్రభాస్-పూజా హెగ్డే జంటగా నటించిన ప్రేమకథా చిత్రం ‘రాధేశ్యామ్’. ప్రేమకీ, విధికీ మధ్య సంఘర్షణ నేపథ్యంలో సాగే ఈ ప్రేమకథ భారీ అంచనాల మధ్య శుక్రవారం ప్రేక్షకుల ముందుకొచ్చింది. మిక్సిడ్ టాక్ సొంతం చేసుకుంది. క్లాస్ సినిమాలు ఇష్టపడే ప్రేక్షకులు రాధేశ్యామ్ క్లాస్ హిట్ అంటున్నారు. అయితే ప్రభాస్ నుంచి మాస్ మసాల కోరుకునే ఆయన అభిమానులు.. నిరాశపడుతున్నారు. టాక్ తో సంబంధం లేకుండా రాధేశ్యామ్ కలెక్షన్స్ అదిరిపోయాయి. యూఎస్ లో తొలిరోజే 1 మిలియన్ మార్క్ ను క్రాస్ చేసింది రాధేశ్యామ్.

యుఎస్ లో ప్రభాస్ వన్ మిలియన్ మార్క్ ను క్రాస్ చేయడం ఇది నాల్గో సారి. గతంలో బాహుబలి, బాహుబలి 2, సాహో సినిమాలు యూఎస్ బాక్సాఫీస్ వద్ద వన్ మిలియన్ మార్క్ ను క్రాస్ చేశాయి. మల్టీఫ్లెక్స్ ప్రేక్షకులకు రాధేశ్యామ్ నచ్చుతుంది. ఎటొచ్చి బి, సి సెంటర్స్ లో రెండో వారానికి డల్ అయ్యే అవకాశాలు కనిపిస్తున్నాయి. అయితే కమర్షియల్ గా సినిమాకు ఎలాంటి లోటు ఉండదని చెబుతున్నారు. దాదాపు రూ. 300కోట్ల బడ్జెట్ తో తెరకెక్కిన ఈ భారీ ప్రేమకథ.. ఆ మొత్తాన్ని తిరిగి రాబట్టగలదు. ప్రభాస్ కు ఉన్న క్రేజ్ దృష్ట్యా అది కష్టమేమీ కాదని ట్రేడ్ వర్గాలు చెబుతున్నాయి. ఇక తెలుగు రాష్ట్రాల్లోనూ రాధేశ్యామ్ తొలిరోజు రికార్డ్ కలెక్షన్స్ రాబట్టింది.