రాజమౌళి.. నువ్వు బంగారం !
సంచలన దర్శకుడు రామ్ గోపాల్ వర్మ ‘ఆర్‌ఆర్‌ఆర్‌’ టీమ్‌పై ప్రశంసల వర్షం కురిపించారు. రాజమౌళి.. నువ్వు ప్రేక్షకులకు దొరికిన బంగారం. ప్రేక్షకుల కోసమే పుట్టావు. నీలాంటి వ్యక్తి ఈ భూమ్మీదకు వచ్చి.. సినిమానే కలగా చేసుకుని.. దర్శకుడిగా మంచి చిత్రాలు తెరకెక్కిస్తున్నందుకు సినీ ప్రియులందరూ ఎంతో ఆనందిస్తున్నారని ఆర్జీవీ అన్నారు. తొలిసారి తన శైలికి భిన్నంగా ఆర్జీవీ స్పందన ఉండటం విశేషం.
“ట్రైలర్‌ చూసినప్పుడు సినిమా బాగుంటుందని భావించాను. కానీ, సినిమా చూశాక తెలిసింది ఇదొక అద్భుతమైన చిత్రం. ఏం చెప్పాలో అర్థం కావడం లేదు. మాటలు కరవయ్యాయి. నేను దేని గురించి మాట్లాడినా ఫుల్‌ క్లారిటీగా ఉంటాను. కానీ జీవితంలో మొదటిసారి ఏం మాట్లాడాలో తెలియడం లేదు.
కథేంటి? పాత్రలు ఎవరు? అనే విషయాన్ని పక్కనపెడితే కథ చెప్పిన విధానం, విజువల్‌గా స్క్రీన్‌పై చూపించిన తీరు నన్నెంతగానో ఆకట్టుకుంది. చరణ్‌ పాత్ర బాగుంది.. లేదు తారక్‌ పాత్ర చాలా బాగుంది.. అని కొంతమంది చెబుతున్నారు. ఆ రెండూ అనవసరమైన మాటలు. ఎందుకంటే, ఎవరికి వాళ్లే ప్రతి సీన్‌లోనూ అదరగొట్టేశారు. గడిచిన 30 ఏళ్లలో ఇంతలా ఏ చిత్రాన్ని నేను ఎంజాయ్ చేయలేదు. రాజమౌళి.. నువ్వు ప్రేక్షకులకు దొరికిన బంగారం” అంటూ ఆర్జీవీ ఆర్ ఆర్ ఆర్ టీమ్ ను ఆకాశానికి ఎత్తేశారు.
