ఎన్టీఆర్’గా బాలయ్య లుక్.. అదిరింది !
హీరో నందమూరి బాలకృష్ణ తన తండ్రి, తెలుగువారి అన్న, మహానటుడు ఎన్టీఆర్ బయోపిక్ ని తీసుకొస్తున్న సంగతి తెలిసిందే. క్రిష్ దర్శకత్వంలో ‘ఎన్టీఆర్’ జీవితగాధ తెరకెక్కుతోంది. గురువారం (జులై 5) హైదరాబాద్ రామకృష్ణ స్టూడియో వేసిన ప్రత్యేక సెట్ లో రెగ్యూలర్ షూటింగ్ ప్రారంభమైంది. సినిమాని సెట్స్ మీదకు తీసుకెళ్లిన మొదటి రోజే అభిమానులకు అదిరిపోయే గిఫ్ట్ ని అందజేసింది చిత్రబృందం. ఎన్టీఆర్ గెటప్ లో బాలయ్య ఉన్న లుక్ ని విడుదల చేశారు. ‘మనదేశం’ చిత్రంలోని ఎన్టీఆర్ లుక్ అది. యంగ్ ఎన్టీఆర్ గా బాలయ్య లుక్ అదిరిపోయింది. బాలయ్యలో ఎన్టీఆర్ ని చూసుకొని తెలుగు ప్రజలు మురిసిపోతున్నారు.
ఈ బయోపిక్ లో ఎన్టీఆర్ సతీమణి బసవతారకం పాత్రలో బాలీవుడ్ నటి విద్యాబాలన్ నటించనుంది. ఇందులో టాలీడ్ స్టార్, యంగ్ హీరోలు నటించబోతున్నట్టు ప్రచారం జరుగుతోంది. సూపర్ స్టార్ కృష్ణ పాత్రలో మహేష్ బాబు, చంద్రబాబుగా రానా దగ్గుపాటి, ఏఎన్నార్ గా సుమంత్ కనిపించబోతున్నారు. ఎల్వీ ప్రసాద్ పాత్రలో బెంగాలీ నటుడు జిషు సేన్ నటిస్తారని తెలిసింది. అంతేకాదు.. బాలయ్య తనయుడు మోక్షజ్ఝ తాత బయోపిక్ తో తెరకు పరిచయం కాబోతున్నట్టు చెబుతున్నారు. ఇందులో బాలయ్య ఏకంగా 60 గెటప్ లో కనిపిస్తారని చెబుతున్నారు. ఈ చిత్రాన్ని సాయి కొర్రపాటి, విష్ణు ఇందూరిలతో కలిసి బాలయ్య నిర్మిస్తున్నారు. తెలుగు ప్రజలు ఎంతో ఆసక్తిగా ఎదురు చూస్తున్న ఈ చిత్రాన్ని వచ్చే యేడాది సంక్రాంతి కానుకగా జనవరి 9న ప్రేక్షకుల ముందుకు తీసుకురానున్నారు.
