యశోద లో రాజమౌళి మార్క్
సమంత ప్రధాన పాత్రపాత్రలో నటించిన చిత్రం ‘యశోద’. ఈ చిత్రానికి హరీష్ – హరి దర్శకులు. పాన్‌ ఇండియా స్థాయిలో తెరకెక్కించారు. ఈ వారమే యశోద ప్రేక్షకుల ముందుకు రానుంది. ఈ నేపథ్యంలో మీడియా ముందుకొచ్చిన దర్శక ద్వయం హరీష్-హరి సినిమా గురించి ఆసక్తికర విషయాలు పంచుకున్నారు.
“వాస్తవ సంఘటనల ఆధారంగా రాసిన కథ ఇది. సరోగసీ అంశం ఇందులో ప్రధానం కాదు. కథలో అదొక భాగమంతే. దానికంటే కీలకమైన విషయాలు కథలో ఉంటాయి. మీడియాలో వచ్చిన వార్తల్ని చూసిన తర్వాత రాసుకున్న స్క్రిప్ట్‌ ఇది. తెరపై ఈ కథని చూస్తున్నప్పుడు ప్రతి ఒక్కరూ షాక్‌ అవుతారు.
ఇదొక మెడికల్‌ మాఫియా తరహా కథ అనుకోవచ్చు. భావోద్వేగాలు సినిమాకి కీలకం. ఆ విషయంలో మాకు దర్శకుడు రాజమౌళి స్ఫూర్తి. ఆయన ప్రతీ సన్నివేశంలోనూ బలమైన భావోద్వేగాలు పండాలని చెబుతుంటారు. తాము కూడా జక్కన్న మాదిరిగా గ్రిప్పింగ్ సన్నివేశాలు తెరకెక్కించాం. సమంత కోసమే సిద్ధమైన ఈ కథలో ఆమె నటించడంతోనే సగం విజయం అందుకున్న అనుభూతి కలిగింది” చెప్పుకొచ్చారు.
