టాలీవుడ్ కు నవదీప్ టెన్షన్

మాదాపూర్ డ్రగ్స్ కేసులో హీరో నవదీప్ అరెస్ట్ కావడం ఖాయంగా కనబడుతోంది. నవదీప్ డ్రగ్స్ వాడుతున్నట్లు గుర్తించామని మీడియా సమావేశంలో హైదరాబాద్ సీపీ సీవి ఆనంద్ వెల్లడించిన సంగతి తెలిసిందే. ప్రస్తుతం నవదీప్ పరారీలో ఉన్నారు. ఆయన అరెస్ట్ కోసం పోలీసులు గాలిస్తున్నట్లు చెప్పారు. అయితే సీపీ చెప్పిన నవదీప్ తాను కాదు. ఆయన హీరో నవదీప్ అని చెప్పలేదు. నిజాలు తెలుసుకొని వార్తలు రాయండి అని హీరో నవదీప్ టెక్కు చూపించిన సంగతి తెలిసిందే. ఆ తర్వాత హైకోర్టుకు వెళ్లి తనని అరెస్ట్ చేయకుండా ముందస్తు బెయిల్ సంపాదించారు. అయితే ఆ బెయిల్ గడువు ఇప్పటికే ముగిసింది.

ఈ నేపథ్యంలో నవదీప్ మరోసారి హైకోర్టును ఆశ్రయించగా ఆయనకు నిరాశే ఎదురైంది. బెయిల్ ను పొడగించేందుకు న్యాయం స్థానం అంగీకరించలేదు. అంతేకాదు.. అతడికి 41 సీ నోటీసులు ఇచ్చి విచారణ చేయవచ్చని కోర్టు గ్రీన్ సిగ్నల్ ఇచ్చింది. ఈ నేపథ్యంలో పోలీసులు నవదీప్ కు నోటీసులు జారీ చేసి.. మూడ్రోజుల్లో విచారణకు హాజరు కావాలని గడువు ఇచ్చారు. దీంతో డ్రగ్స్ కేసులో నవదీప్ పోలీసుల ఎదుట విచారణకు హాజరుకావడం తప్పని పరిస్థితి. అదే జరిగితే టాలీవుడ్ లో బడా బాబుల పేర్లు బయటకు వచ్చే అవకాశాలు ఉన్నాయనే టాక్ గట్టిగా వినబడుతోంది.

ఎందుకంటే ? టాలీవుడ్ లో ఏ డ్రగ్స్ కేసు వెలుగులోకి వచ్చినా.. ముందు వినిపించే పేరు హీరో నవదీప్. ఈ నటుడు నుంచి టాలీవుడ్ లోని ప్రముఖులు, వారి పిల్లలకు డ్రగ్స్ చేరినట్లు ఆరోపణలు ఉన్నాయి. నిజానికి నవదీప్ సినిమాలతో కంటే డ్రగ్స్ కేసులతోనే పాపులర్ అయ్యారు. ఆయనకు స్టార్ హీరోలతో.. వారి కుటుంబ సభ్యులతో పరిచయాలు ఉన్నాయి. రాజకీయ నేతల వారసులు సైతం నవదీప్ తో టచ్ లో ఉంటారు. డ్రగ్స్ వ్యవహారాల్లో వారికి మరక అంటబోతున్నట్లు తెలుస్తోంది. మొత్తానికి ఇప్పుడు టాలీవుడ్ కు నవదీప్ భయం పట్టుకుంది.