ఈసారి ఇంద్రగంటి యాక్షన్ !

విభిన్నమైన కథలు ఎంచుకొంటూ, కథ-కథనాలని అద్భుతంగా నడిపించడం దర్శకుడు ఇంద్రగంటి ప్రత్యేకత. ఆయన తొలి చిత్రం ‘గ్రహణం’తోనే జాతీయ అవార్డుని అందుకొన్నారు. ఆ తర్వాత ఆయన నుంచి అష్టాచమ్మా, సాహాసం, జెంటిల్ మేన్, అమీతుమీ సినిమాలొచ్చాయి. ఇటీవలే ప్రేక్షకుల ముందుకొచ్చిన ఇంద్రగంటి ‘సమ్మోహనం’ విమర్శకుల ప్రశంసలు అందుకొంది. తెలుగు రాష్ట్రాలు, యుఎస్ లోనూ మంచి కలెక్షన్స్ సాధించింది. ఇప్పుడీ దర్శకుడి పేరు ఇండస్ట్రీలో మారుమ్రోగిపోతుంది. ఆయనతో సినిమా చేసేందుకు స్టార్ హీరోలు ఆసక్తి చూపుతున్నారు. ఐతే, ‘సమ్మోహనం’ సినిమా విడుదలకు ముందే ఇంద్రగంటి దిల్ రాజుకు మాటిచ్చాడు.

ఇటీవలే ఇంద్రగంటి దిల్ రాజుకు ఓ కథ వినిపించి.. ఓకే చేసుకొన్నాడు. ఆ కథకి హీరోని ఎంపిక చేసే బాధ్యతని కూడా దిల్ రాజుపైనే పెట్టాడు. ఇప్పుడు ఇంద్రగంటి సినిమా కోసం హీరోని సెట్ చేసే పనిలో దిల్ రాజు ఉన్నాడు. ఐతే, ఇది మల్టీస్టారర్ సినిమాని అని తెలుస్తోంది. ఈ నేపథ్యంలో దిల్ రాజు పని డబుల్ అయ్యింది. ఆయన ఇద్దరు హీరోలని సెలక్ట్ చేయాల్సి ఉంది. ఇదీగాక, ఇదో యాక్షన్ థ్రిల్లర్ అని చెబుతున్నారు. జెంటిల్ మన్ తర్వాత ఇంద్రగంటి మరోసారి ప్రేక్షకులని థ్రిల్ చేయడానికి రెడీ అవుతున్నాడన్న మాట. త్వరలోనే ఈ యాక్షన్ థ్రిల్లర్ మల్టీస్టారర్ నటీనటుల వివరాలు తెలియనున్నాయి.

ప్రస్తుతం టాలీవుడ్ లో మల్టీస్టారర్స్ హవా కొనసాగుతోంది. ఇందులో రెండు మల్టీస్టారర్స్ దిల్ రాజు బ్యానర్ లో రాబోతున్నాయి. ఇప్పటికే వెంకీ-వరుణ్ తేజ్ ల ‘ఎఫ్ 2’ సెట్స్ మీదకు వెళ్లింది. త్వరలో ఇంద్రగంటి యాక్షన్ థ్రిల్లర్ మల్టీస్టారర్ ప్రారంభం కాబోతుంది. ఇవీగాక, నాగ్-నానిల దేవదాస్, వెంకీ-చైతూల వెంకీమామ మల్టీస్టారర్స్ తెరకెక్కుతోన్న సంగతి తెలిసిందే.