‘సాహో’ కోసం మరో యేడాది.. !
‘బాహుబలి’ తర్వాత యంగ్ రెబల్ స్టార్ ప్రభాస్ ‘సాహో’ సినిమాతో బిజీ అయిపోయాడు. సుజీత్ దర్శకత్వంలో తెరకెక్కుతోన్న యాక్షన్ థ్రిల్లర్ ఇది. ఐతే, ‘సాహో’ కోసం మరో యేడాది ఎదురుచూడక తప్పేలా లేదు. ఇటీవలే ‘సాహో’ దుబాయ్ షెడ్యూల్ ని పూర్తి చేసుకొంది. అక్కడ స్టంట్ కొరియోగ్రఫర్ కెన్నీ బేట్స్ పర్యవేక్షణలో హెవీ ఛేజింగ్ సన్నివేశాలను షూట్ చేశారు. దీనికోసం ఏకంగా రూ. 90కోట్లు ఖర్చు చేశారు. ఈ యాక్షన్ ఏపీసోడ్ సినిమాకే హైలైట్ గా నిలుస్తుందని చెబుతున్నారు.
ప్రస్తుతం ఈ సినిమా హైదరాబాద్ లో షూటింగ్ జరుపుకుంటోంది. రామోజీఫిల్మ్ సిటీలో కొన్ని కీలక సన్నివేశాలని చిత్రీకరించనున్నారు. బాహుబలి తర్వాత ప్రభాస్ చేస్తున్న సినిమాకావడంతో ‘సాహో’పై ప్రేక్షకుల్లో భారీ అంచనాలున్నాయి. అందుకు తగ్గట్టుగానే భారీతనంతో తెరకెక్కుస్తున్నారు. తెలుగు, తమిళ్, హిందీ, మలయాళ బాషల్లో సినిమాని విడుదల చేయనున్నారు. ఐతే, సాహో ని థియేటర్స్ లో చూసేందుకు మరో యేడాది పాటు ఎదురుచూడక తప్పేలా లేదు. ఈ సినిమాని వచ్చే యేడాది ఆగస్టులో ప్రేక్షకుల ముందుకు తీసుకొచ్చేందుకు యూవీ క్రియేషన్స్ ప్లాన్ చేసినట్టు సమాచారమ్.
ఈలోపు సినిమాకు సంబంధించిన విశేషాలని అభిమానులతో పంచుకొనేందుకు ప్లాన్ చేశారట. బాహుబలి, బాహుబలి 2 కోసం ప్రభాస్ ఫ్యాన్స్ కళ్లు కాయలు కాసేలా ఎదురు చూశారు. ఇప్పుడు ‘సాహో’ కోసం అదే రేంజ్ లో వెయిట్ చేయిస్తున్నాడు ప్రభాస్. సినిమాలే కాదు.. పెళ్లి విషయంలోనూ ప్రభాస్ నుంచి వెయిటింగే. ఆయన సినిమాల్లా.. ఆయన పెళ్లి ఎప్పుడు జరుగుతుందో తెలియడం లేదు… !
ఇక, ‘సాహో’లో ప్రభాస్ సరసన బాలీవుడ్ బ్యూటీ శ్రద్ధా కపూర్‌ జతకట్టనుంది. హాలీవుడ్, బాలీవుడ్ కు చెందిన నటులు, టెక్నీషన్స్ సాహో కోసం పని చేస్తున్నారు. దాదాపు రూ. 300కోట్ల భారీ బడ్జెట్ తో ప్రభాస్ సొంత బ్యానర్’గా పిలవబడే యూవీ క్రియేషన్స్ ఈ చిత్రాన్ని నిర్మిస్తోంది.
