ఏఎన్నార్’గా సుమంత్.. ఫిక్స్ !
ఎన్టీఆర్ జీవిత కథ ‘ఎన్టీఆర్’ పేరుతో తెరకెక్కుతోన్న సంగతి తెలిసిందే. ఎన్టీఆర్ పాత్రలో ఆయన తనయుడు బాలకృష్ణ కనిపించనున్నారు. క్రిష్‌ దర్శకత్వం వహిస్తున్నారు. ఈ బయోపిక్ లో అక్కినేని నాగేశ్వరరావు పాత్రలో అక్కినేని నాగచైతన్య కనిపించనున్నారని చాలా రోజులుగా ప్రచారం జరుగుతోంది. ఐతే, ఈ పాత్ర కోసం సుమంత్ ని తీసుకొన్నారు. ఈ విషయాన్ని సుమంత్ ట్విట్టర్ వేదికగా తెలియజేశారు. “ఎన్టీఆర్ బృందంతో కలిసి పనిచేయడం గౌరవంగా భావిస్తున్నా. ఈ ప్రతిష్ఠాత్మక ప్రాజెక్టులో మా తాతయ్య ఏయన్నార్‌ పాత్రను పోషిస్తున్నా. ధన్యవాదాలు” అని ట్వీట్ చేశారు.
ఈ యేడాది ప్రేక్షకుల ముందుకొచ్చిన ‘మహానటి’ సావిత్రి బయోపిక్ లో ఏఏన్నార్ గా నాగ చైతన్య సందడి చేశారు. ‘ఎన్టీఆర్’ బయోపిక్ కోసం కూడా మొదట నాగ చైతన్య పేరే వినిపించింది. ఐతే, మరోసారి చైతూనే ఏఎన్నార్ గా చూపిస్తే ప్రేక్షకులు రొటీన్ గా ఫీలవుతారనే ఉద్దేశంతో సుమంత్ ని తీసుకొన్నట్టు తెలుస్తోంది. ఇక, ఈ సినిమా బసవతారకంగా విద్యా బాలన్‌ నటిస్తున్నారు. సూపర్ స్టార్ కృష్ణ పాత్రలో మహేష్ బాబు, శ్రీదేవి పాత్రలో రకుల్ ప్రీత్ సింగ్, సావిత్రి పాత్రలో కీర్తి సురేష్ నటించబోతున్నట్టు ప్రచారం జరుగుతోంది.
