విషాదం : మాజీ క్రికెటర్‌ మృతి
మాజీ క్రికెటర్‌, బెంగాల్ క్రికెట్‌ జట్టు మాజీ కెప్టెన్‌ గోపాల్‌ బోస్(71) కన్నుమూశారు. గుండెపోటుతో ఇంగ్లాండ్‌లోని బర్మింగ్‌హామ్‌లో ఆయన తుదిశ్వాస విడిచారు. ఓపెనర్‌ బ్యాట్స్‌మెన్‌ అయిన బోస్.. 78 ఫస్ట్‌క్లాస్‌ క్రికెట్‌ మ్యాచ్‌లు ఆడారు. మొత్తం 3,757 పరుగులు చేశారు. అందులో 8 సెంచరీలు, 17 అర్ధ సెంచరీలు ఉన్నాయి. 72 వికెట్లు కూడా తీశారు.
అంతర్జాతీయ జట్టు తరఫున ఒకే ఒక్క మ్యాచ్‌ ఆడారు. 1974లో భారత్‌ తరఫున ఇంగ్లాండ్‌తో తొలి వన్డే ఆడారు. బెంగాల్ నుంచి అప్పటి వరకు ఆడిన తొలి క్రికెటర్‌ ఈయనే కావడం గమనార్హం. అనంతరం బెంగాల్ జట్టుకు కోచ్‌గా బాధ్యతలు చేపట్టారు. ఎంతో మంది ఆటగాళ్లను తయారుచేశారు. 2008లో కౌలాలంపూర్‌లో జరిగిన ప్రపంచకప్‌ను ముద్దాడిన కోహ్లీ నేతృత్వంలోని అండర్‌-19 జట్టుకు గోపాల్‌ బోస్ మేనేజర్‌గా వ్యవహరించారు. ఆయనకు భార్య, కుమారుడు అర్జిత్‌ ఉన్నారు.
