రానా సినిమాపై నాని మోజు

కొత్తదనం కోరుకొనే కథానాయకుడు రానా దగ్గుపాటి. ‘బాహుబలి’ సినిమాతో ఇంటర్నేషన్ స్టార్ గా ఎదిగాడు. ఘాజీ, నేనే రాజు, నేనే మంత్రి లాంటి విభిన్నమైన సినిమాలతో ఆకట్టుకొన్నాడు. టాలీవుడ్, కోలీవుడ్.. బాలీవుడ్, హాలీవుడ్ అనే తేడానే లేదు. ఎక్కడ కొత్త కథ దొరికితే అక్కడ వాలిపోతాడు. నిర్మాతగానూ విభిన్నమైన సినిమాతో ప్రేక్షకుల ముందుకు రాబోతున్నాడు. సురేశ్‌ ప్రొడక్షన్స్‌ పతాకంపై రానా సమర్పిస్తున్న చిత్రం ‘కేరాఫ్‌ కంచరపాలెం’. ఇందులో అందరూ నూతన నటీనటులే. వెంకటేశ్‌ మహా ఈ సినిమాకు దర్శకత్వం వహించారు. విజయ ప్రవీణ పరుచూరి నిర్మాతగా వ్యవహరిస్తున్నారు. స్వీకర్‌ అగస్థి సంగీతం అందిస్తున్నారు.

న్యూయార్క్‌ చలన చిత్రోత్సవంలో ప్రదర్శనకు ఎంపికైన తొలి తెలుగు సినిమా ఇది. వైజాగ్‌ దగ్గరలో ఉన్న కంచర‌పాలెం అనే గ్రామం నేప‌థ్యంలో సాగే భిన్న‌మైన ప్రేమ‌క‌థ. ఈ సినిమాలోని నటీనటులు కూడా అదే గ్రామానికి చెందిన వారు కావడం విశేషం. ఇప్పటికే ఈ సినిమా ప్రత్యేక షోను చూసిన రాజమౌళి, క్రిష్‌, సుకుమార్, నాని తదితరులు చిత్రం తెగ నచ్చేసిందని అన్నారు. సినిమా చూసి బాగుంది అని మాత్రమే చెప్పే రాజమౌళి.. ‘కంచర‌పాలెం’ తప్పక చూడండని చెబుతున్నాడు.

ఈ సినిమాలోని నటీనటులకు నేచురల్ స్టార్ నాని పెద్ద ఫ్యాన్ అయిపోయాడు. ఈ చిత్ర దర్శకుడు, నటీనటులతో కలిసి దిగిన సెల్ఫీను రానా ఇన్‌స్టాగ్రామ్‌లో షేర్‌ చేశారు. ‘‘కంచరపాలెంలో ‘కంచరపాలెం’ సినిమా స్టార్స్‌, దర్శకుడితో..’ అని పోస్ట్‌ చేశారు. దీన్ని చూసిన నాని ట్విటర్‌లో స్పందిస్తూ.. ‘వారికి నేను పెద్ద అభిమానిని. వారితో కలిసి ఓ ఫొటో తీసుకోవచ్చా నిర్మాత (రానా) గారు?’ అని నవ్వుతూ అడిగారు. దీనికి సురేష్‌ ప్రొడక్షన్స్‌ సంస్థ స్పందిస్తూ.. ‘త్వరలో ప్లాన్‌ చేద్దాం నాని గారు’ అని పేర్కొంది. విడుదలకు ముందే రాజమౌళి, క్రిష్‌, సుకుమార్, నాని.. లాంటి వారి మనసు దోచేసిన కంచెరపాలెం.. రికార్డులు సృష్టించేలా కనబడుతోంది.